sábado, 11 de marzo de 2017

El faisán: la voz del monte cantábricu

El cordal cantábricu espúrrese dende l'oriente de Galicia, a Asturies, Cantabria, Euskadi, León, Burgos y Palencia.

Nél habiten especies animales a esgaya. Si'l día pinta afayadizu puen observase ferres, utres, aigles, corzos, rebecos, venaos, xabariles, raposos...

Pero hai dos tribes animales que rescamplen sobremanera porque trespasen la so condición d'especies biolóxiques p'algamar otra dimensión que ye la de consideralos símbolos identitarios de los territorios onde perviven. Esti ye, por exemplu, el casu d'Asturies. Y eses dos tribes animales son l'osu pardu y el faisán o gallu monte cantábricos.

Son dos subespecies estremaes de les sos hermanes europees pol so aisllamientu milenariu nel cordal cantábricu. Nel casu del osu ye d'un tamañu menor que los d'otres zones más al norte d'Europa. Nel casu del faisán ye la única subespecie d'esta ave qu'habita en viesques caducifolies en vez de facelo n'ámbitos au l'arboleda ye de fueya perenne.

Y dambes especies comparten la mesma llaceria. Tuvieron a piques de quedar desaniciaes al entamar los años noventa del sieglu pasáu por aciu de la caza intensiva que menguó la so población hasta'l finxu del casi esterminiu, amás d'otros factores añadíos que contribuyeron a la mengua de les poblaciones.

D'entós p'acá son especies protexíes y vien tratándose de recuperales. Pero los resultaos dixébrense en dambos casos.

Nel casu del osu pardu, consiguióse dir aumentando la población, fundamentalmente na zona más occidental del cordal. Anque hoi nun ta fuera del peligru d'estinción, sí se llogró superar les peores fases y el futuru apaez más escampláu.

Otra suerte corrió'l casu del gallu monte o faisán. La so población siguió menguando col pasu de los años y na actualidá queden pocos cantaderos (sitios u gargolien el so cantu de cortexu) onde se puedan sintir. Los mesmos estudiosos de la so situación nun son quien a coincidir nes causes y soluciones qu'eviten esti desaniciu que tal paez sigue avanzando.

Too ello fai que'l faisán seya anguaño la especie emblemática asturiana más cercana al precipiciu de la desaparición. Quiciabes, como apunten dellos estudiosos del tema, caltener na mayor pureza xabaz les zones onde tovía perviven, protexéndoles como auténticos santuarios d'esta ave, puea ser una solución.

Oxalá que nos años vinientes puedan aportamos noticies de que'l faisán llogra por fin frenar el so desaniciu y vaya consiguiendo, pasu ente pasu, recuperar la so población.

Comenta xente que lu escuchó cantar, allá no cimero de la viesca, que ye una de les sensaciones más impresionantes que se puen esfrutar.

Tamién hai quien comenta que si desapaecen los faisanes, los montes cantábricos van ser otra cosa, va morrer la viesca xabaz d'antaño pa pasar a ser otra estremada.

Coincido dafechu con esta apreciación cabera. Porque camiento que si daqué día desapaeciere'l faisán desapaecería tamién con illi la voz ancestral y milenaria del monte cantábricu y, en consecuencia, del asturianu.

Y voi roblar esti post dexándovos un documental perguapu sobre esta ave emblemática del cordal cantábricu. Recomiéndovos que lu veais. Paga la pena.
                                                                                 

sábado, 18 de febrero de 2017

Caleyando pel monte

Hai un dichu que siempre conocí y que diz que la cabra tira al monte. Vamos, que cadún acaba empobinando p'aquellos sitios onde s'afaya. Y bien de xente afáyase enfilando pal monte a caminar.

Hoi ye un día del iviernu. Anúncienlu escampláu y con xelada. Llevántome ceo. Ta amaneciendo. Almuerzo, vístome, garro'l palu y salgo camín de la viesca.

Dempués d'un cachu caminando algamo les afueres de la villa. Cases con corrada au puen vese les madreñes a la puerta casa. Un autobús escolar para a recoyer a un grupu de rapacinos. La xubida ye empluna, pero per carretera asfaltada.

Dexo atrás les últimes cases. Salgo del asfaltu pa empobinar pel camín de tierra y piedres cubiertu pola fueyarasca. Castañales, abedurios, carbayos...la viesca entama a arrodiame. Ye un monte con arboleda autóctona. Nos claros abiertos pal ganáu puen vese vaques, caballos, burros, oveyes, pero pocoñinos y sólo de xemes en cuando. Tamién hai quien suelta cabres pente los matos. Esmuerguen los escayos verdes que tán sol felechu y dexen la zona onde tán como si la rozaren. Ye corriente que t'afayes sólu y ensin cruzate prácticamente con naide. El xuxuriar de los páxaros, el ruxir de les fueyes, o el tinglar de les esquiles, igüen l'atmósfera sonora del llugar. Dalguna vegada vi un corzu o un rebecu, qu'a distancia nun los estremo bien. Tamién se ve dacuando'l rastru de fozar el xabaril, que cunten que los hai a embute...

La fueyarasca sigue anubriendo'l camín y los felechos tiñen de collorao la contorna. Al tar la vexetación achaplada por aciu del iviernu puen vese los furacos de cuando na postguerra la xente andaba escarbando pa sacar carbón. Esti mineral fósil forma'l subsuelu del monte y, a vegaes, alcuéntrase a flor de tierra. Una castañal vieya que valtaron l'aire y l'agua dexa ver lláscares de carbón ente los sos raigaños. Esti monte tien tamién la so particular llaceria, anque doliosamente compartida con abondos más. Trátase del fueu que yá lu amburó delles vegaes. Precisamente ún de los árboles que más m'impresionó foi una castañalona enforma vieya, quemada y güeca, pero viva y que na seronda da unes ambozaes de castañes pegordes y prestoses.

Pa un requexu mana l'agua de so la tierra pa un barcal que tienen ellí fechu pa que beba'l ganáu. Antes ñacía d'ellí un regatu, pero va años que la fonte escosa una bona parte del añu y el regatu sumióse. Hai una bona variedá de cogordes qu'entamen a vese pela seronda y siguen xuxendo nel iviernu. Tamién atopé una cueva furada na piedra y que nun sé si sedrá ñatural o fecha arrémente pa buscar mineral o con otra finalidá. Dacuando pases al llau de dalguna casa esbarrumbada. Una d'elles tien grabada na fachada una fecha del últimu terciu del sieglu XIX.

En tol monte sólo atopé dos fayones bien vieyes, quiciabes escatafinos d'otros tiempos, o almeyor plantaes nel so tiempu a costa fecha. Non mui lloñe d'elles hai otres dos bastante nueves. Chócame que, magar el trescurrir de los años, nun se reproducieren hasta tiempos bien recientes. En fin, coses de la ñatura. Tampoco nun atopé nenyures arfueyu. Nun sé'l motivu, pero, en teoría, camiento que podría dase guapamente, por exemplu, nes cañes de los carbayos más vieyos, que los hai con traza de ser centenarios.

Col sol rescamplando allarribón les vistes son perguapes. Pues nortiar los pueblos que van espurriéndose dende'l valle peles lladeres de los montes hasta prácticamente la coguruta d'ellos. A lo último, pal finxu'l cielu, vese'l cordal del Aramo cubiertu pola ñeve.

Puedo escoyer bien de carreros pa caminar. Nun se trata de dir a un sitiu en concreto. Simplemente mecese pente l'arboleda, observar, sentir, y espansionar, qu'eso mialma que se consigue cuando te somorguies per estos llugares.

Pali que pali, van pasando les hores de la mañana. Acércase'l mediu día y ye hora de dir baxando otra vuelta pa la villa. La xornada de monte va aportando al so final. Espera una bona ducha y a funcionar per ende'l restu'l día.
                                                   





sábado, 4 de febrero de 2017

Día de mercáu

Hoi ye sábadu, y los sábados son per equí día de mercáu. Faise alrodiu la plaza d'abastos. Dientro d'ella hai carniceríes, pescaderíes, puestos de fruta...Fuera allúguense dellos puestos de xente que vien a vender productos del campu y otros que vienden, so los sos entoldaos, ropa, calzáu, etc.

Ente esos puestos de calzáu hai ún que viende madreñes, davezu barnizaes en ñegro. Y si se vienden ye porque s'usen, y miániques que sí s'usen. Tovía anguaño nes afueres de los nuestros pueblos y villes ye bien corriente agüeyar pares de madreñes a les puertes de les cases.

Lo asocedío con esti calzáu ye bien interesante. Sobrevivió al usu cotidianu del traxe'l país. De calzales con escarpinos pasaron a facelo adaptándose a les más modernes zapatielles. Tuvieron pa ello qu'abri-yos más la boca, faciéndoles más anches. Tamién s'iguaron tipoloxíes pa usales nes villes, faciéndo unes madreñes más fines y llixeres y hasta había quien-yos echaba serbus como a los zapatos.

Nestos mercaos que se siguen cellebrando per dayures a lo llargo y ancho d'Asturies pues mercar casi de too. Alimentos, ropa, plantes, bisutería. Vienen a ser un antecedente de lo qu'actualmente conocemos como grandes superficies comerciales. Tamién son estos mercaos aruelos onde s'alcuentra la xente y aprovecha pa echar una rocada, o pa dir al chigre o cafetería más cercanos a da-y a la parpayuela. De fechu, un sábadu como hoi a eso del mediu día, ye ún de los díes que más xente abeya pelos establecimientos hosteleros.

Y arrodiando al cogollu del mercáu, a la plaza d'abastos y los puestos asitiaos cabo d'ella, afáyense un puñáu de supermercaos tamién bien nutríos de xente. Talo paez que toos se retroalimenten, puestos del mercáu, hostelería y supermercaos. Nótase tamién que vien xente de fuera. Basta pa comprobalo con dar una revolada peles zones au aparquen los coches, que tán atarraquitaes d'ellos.

Camiento que ye perimportante caltener los mercaos qu'anguaño se siguen cellebrando pel país. Yo, recuérdenme cuando, allá de los tiempos, fundaron les "poles", que nun yera utra cosa qu'una manera d'axuntar a la xente en ñoyos de población y  onde'l mercáu, como centru d'intercambiu, yera un elementu perimportante.

En fin, que tamos en día de mercáu. Habrá que dir a dar una vueltiquina per illi y, si pinta, mercar tamién daqué, qué coime...